ივანე ჯავახიშვილის სახელობის თბილისის სახელმწიფო უნივერსიტეტის ეკონომიკისა და ბიზნესის ფაკულტეტის ხელმძღვანელობა, ა.წ. 20 ნოემბერს, ქალაქ რუსთავის მე-14 და 24-ე საჯარო სკოლას ეწვია. დელეგაციის შემადგენლობაში შედიოდნენ ფაკულტეტის დეკანი, პროფესორი თეიმურაზ ბერიძე, დეკანის მოადგილე, ასოცირებული პროფესორი მარინა ჩავლეიშვილი, საერთაშორისო ბიზნესის კათედრის მოწვეული პროფესორი გივი ბედიანაშვილი, თსუ „ნორჩი ეკონომისტის სკოლის“ კოორდინატორი მარი უკლება და ფაკულტეტის საზოგადოებასთან ურთიერთობების სამსახურის უფროსი უჩა გოგიშვილი.
ეკონომიკისა და ბიზნესის ფაკულტეტის წარმომადგენლებმა სკოლის უფროსკლასელებს გააცნეს დედა უნივერსიტეტის დაარსების ისტორია, ფაკულტეტის დღევანდელი სტრუქტურა და არსებული სასწავლო პროგრამები.
მომავალ აბიტურიენტებში დიდი ინტერესი გამოიწვია უნივერსიტეტის წარმომადგენლების სტუმრობამ და მათ, სწავლის პირობების შესახებ, სტუმრებს მრავალი შეკითხვა დაუსვეს.
