ლიტერატურული მარათონი - შოთა რუსთაველის „ვეფხისტყაოსანი“ 50 ენაზე

21 ივნისს, 20.00 საათზე, ფრანკფურტის გოეთეს სახელობის უნივერსიტეტის ემპირიული ენათმეცნიერების ინსტიტუტში ლიტერატურული მარათონი გაიმართება, რომელზეც ქართული ლიტერატურის შედევრი, შოთა რუსთაველის ეპოქალური პოემა „ვეფხისტყაოსანი“  50 ენაზე იქნება წარმოდგენილი.  ღონისძიებას თსუ რექტორი გიორგი შარვაშიძე დაესწრება.

ლიტერატურული მარათონი საქართველოს, როგორც ფრანკფურტის წიგნის ბაზრობის საპატიო ქვეყნის კულტურული პროგრამის ფარგლებში იმართება და საქართველოს დამოუკიდებელი რესპუბლიკის გამოცხადების 100 წლისთავსა და თბილისის სახელმწიფო უნივერსიტეტის დაარსების 100 წლის იუბილეს ეძღვნება.

ფრაგმენტებს „ვეფხისტყაოსნიდან“ წაიკითხავენ ფრანკფურტის გოეთეს სახელობის უნივერსიტეტისა და თბილისის სახელმწიფო უნივერსიტეტის სტუდენტები და აკადემიური პერსონალი. ლიტერატურული მარათონის ფარგლებში წარმოდგენილი იქნება ვეფხისტყაოსნის მხატვრული გაფორმების ნიმუშები დიგიტალურად (მინიატურებით შემკობილი ხელნაწერები და ილუსტრაციები სხვადასხვა გამოცემებიდან). პროექტის ავტორია ფრანკფურტის უნივერსიტეტში კავკასიოლოგიის მიმართულების ხელმძღვანელი პროფესორი მანანა თანდაშვილი.

პროექტს აფინანსებს ქართული წიგნის ეროვნული ცენტრი, ფრანკფურტის უნივერსიტეტი, თბილისის სახელმწიფო უნივერსიტეტი, ქალაქ ფრანკფურტის კულტურის დეპარტამენტი და ფრანკფურტის მერიის ინტერკულტურული ურთიერთობების დეპარტამენტი. პროექტის მხარდამჭერები არიან: გურიელის ჩაი (GEOPLANT) და ღვინის კომპანია GEORGIAN WINE.