ივანე ჯავახიშვილის სახელობის თბილისის სახელმწიფო უნივერსიტეტის ევროპული კვლევების ინსტიტუტის დირექტორისა და მდივნის თანამდებობებზე კონკურსის გამოცხადების შესახებ

"უმაღლესი განათლების შესახებ" საქართველოს კანონის 23-ე, 24-ე მუხლების, საქართველოს განათლებისა და მეცნიერების მინისტრის 2008 წლის 29 მაისის №490 ბრძანებით დამტკიცებული "საჯარო სამართლის იურიდიული პირის – ივანე ჯავახიშვილის სახელობის თბილისის სახელმწიფო უნივერსიტეტის წესდების" 25-ე მუხლის 1-ლი პუნქტის "ზ" ქვეპუნქტის საფუძველზე,

ვ ბ რ ძ ა ნ ე ბ:

1.    გამოცხადდეს კონკურსი ევროპული კვლევების ინსტიტუტის დირექტორის თანამდებობის დასაკავებლად;

2.    ინსტიტუტის დირექტორი აირჩევა ორი წლის ვადით;

3.    ინსტიტუტის დირექტორს მოეთხოვება:
ა) სამეცნიერო-კვლევითი და საგანმანათლებლო თანამშრომლობის განვითარება საზღვარგარეთის ქვეყნების წამყვან უნივერსიტეტებსა და ინსტიტუტებთან;
ბ) განათლების ევროპული ტრადიციების და თანამედროვე ევროპული სტანდარტების დამკვიდრებაში, ერთიან ევროპულ საგანმანათლებლო სივრცეში უნივერსიტეტის ინტეგრაციის ხელშეწყობა;
გ) თსუ-ს ფაკულტეტებთან სწავლებისა და კვლევების კოორდინირებულად წარმართვა;
დ) საქართველოში ევროპული ინსტიტუტების, ფასეულობებისა და ღირებულებების შესახებ ცოდნის გავრცელება;
ე) სამაგისტრო და სადოქტორო სასწავლო პროგრამების დისტანციური სწავლების ორგანიზება;
ვ) უწყვეტი განათლების სისტემის ამოქმედებასა და სამეცნიერო კვლევების ინოვაციური მეთოდების დანერგვის ხელშეწყობა;
ზ) ეროვნული და საერთაშორისო გრანტების მოძიება;
თ) ევროპული კვლევების მიმართულების მაგისტრის ან დოქტორის აკადემიური ხარისხი;
ი) ინგლისური ენის სრულყოფილად ფლობა;

4.    ინსტიტუტის დირექტორის თანამდებობაზე ასარჩევი კანდიდატი ვალდებულია წარმოადგინოს:
ა) განცხადება კომისიის სახელზე;
ბ)    ავტობიოგრაფია (cv) ქართულ და ინგლისურ ენებზე;
გ) პირადობის მოწმობის ასლი;
დ) ინსტიტუტის სტრატეგიული განვითარების გეგმა;
ე) განათლების დამადასტურებელი დიპლომის (დიპლომების) ასლი;
ვ) კვალიფიკაციის დამადასტურებელი სერტიფიკატის (სერტიფიკატები) ასლი.

5. გამოცხადდეს კონკურსი ევროპული კვლევების ინსტიტუტის მდივნის თანამდებობის დასაკავებლად;

6. ინსტიტუტის მდივანს მოეთხოვება:
ა) სამაგისტრო და სადოქტორო პროგრამების განხორციელებაში ინსტიტუტის დირექტორის საქმიანობის ხელშეწყობა;
ბ) ინსტიტუტის რესურს-ცენტრისა და ბიბლიოთეკის მართვა;
გ) ინსტიტუტის სტუდენტთა და პედაგოგების სასწავლო მასალებით უზრუნველყოფა;
დ) ინსტიტუტის დოკუმენტაციის თარგმნა (ინგლისურიდან ქართულად და პირიქით);
ე) დისტანციური სწავლების ორგანიზაციული ხელშეწყობა;
ვ) უცხოელი ექსპერტების ლოგისტიკური საკითხების მოგვარება;
ზ) ინგლისური ენის სრულყოფილად ფლობა;

7. ინსტიტუტის მდივნის თანამდებობაზე ასარჩევი კანდიდატი ვალდებულია წარმოადგინოს:
ა) განცხადება კომისიის სახელზე;
ბ) ავტობიოგრაფია ( cv ქართულ და ინგლისურ ენაზე);
გ) პირადობის მოწმობის ასლი;
დ) განათლების დამადასტურებელი დიპლომის (დიპლომების) ასლი;
ე) კვალიფიკაციის დამადასტურებელი სერტიფიკატის (სერტიფიკატები) ასლი.

8. კონკურსის შედეგად შერჩეული ინსტიტუტის დირექტორისა და მდივნის შრომის ანაზღაურების ოდენობა და სხვა პირობები აისახოს შრომით ხელშეკრულებებში;

9. ევროპული კვლევების ინსტიტუტის დირექტორისა და მდივნის შერჩევა ეთხოვოს ინსტიტუტის მმართველთა საბჭოს;

10. დამტკიცდეს კომისიის (მმართველთა საბჭოს) მუშაობის წესი;

11. საბუთების მიღება იწარმოებს 2010 წლის 24 მარტიდან 19 აპრილის     ჩათვლით თსუ-ს II კორპუსში (ი. ჭავჭავაძის გამზ. №3, ოთახი 158. 9-00 სთ-დან 18-00 სთ-მდე );

12. კონკურსი ჩატარდება 2010 წლის 20 აპრილიდან 27 აპრილამდე პერიოდში;

13. ბრძანება განთავსდეს თსუ-ს ოფიციალურ ვებ-გვერდზე;

14. ინფორმაცია ევროპული კვლევების ინსტიტუტის დირექტორისა და მდივნის თანამდებობებზე კონკურსის შესახებ განთავსდეს www.jobs.ge-ზე და www.hr.com.ge-ზე;

15. ბრძანება ძალაშია ხელმოწერისთანავე.

საფუძველი: ევროპული კვლევების ინტიტუტის მმართველთა საბჭოს სხდომის ოქმი №1 04.03.2010წ. ევროპული კვლევების ინსტიტუტის დებულება.

ადმინისტრაციის ხელმძღვანელის
მოვალეობის შემსრულებელი                                    რ. ხარბედია

« უკან დაბრუნება